യുഗാദി!!! കര്‍ണാടകയിലെ പുതുവര്ഷം..... ഇവിടെ വന്നതിനു ശേഷം പങ്കെടുക്കാന്‍ പോകുന്ന ഏഴാമത്തെ യുഗാദിയാണ് നാളെ... പ്രിയപ്പെട്ട കൂട്ടുകാരോടൊപ്പം എപ്പോഴും ആഘോഷങ്ങളില്‍ പങ്കു ചേരാറുണ്ടെങ്കിലും ഈ വര്ഷം ഒരുപാട് വിലപെട്ടതായ് തോന്നുന്നു... എന്ത് കൊണ്ടാണെന്നറിയില്ല , ഒരു പക്ഷെ ഒരുപാട് പ്രിയപ്പെട്ട ഈ നാടിനെയും പ്രിയ സുഹൃത്തുക്കളെയും പിരിഞ്ഞു പോവാന്‍ സമയം ആയി എന്ന തിരിച്ചറിവ് നല്കുന്ന വേദന തന്നെയാവാം ഈ യുഗാദിക്ക് മാധുര്യം കൂടാന്‍ കാരണം.
ഒരുപാട് സന്തോഷങ്ങളും, ദു:ഖങ്ങളും സമ്മാനിച്ച നാട്.... എവിടെപോയാലും അഞ്ചു ദിവസങ്ങള്‍ക്കപ്പുരം ഈ നാടിനെ പിരിയാന്‍ കഴിയുമായിരുന്നില്ല.. ഈ നാടിലേക്ക്, ഇത്രത്തോളം ചേര്‍ത്ത് നിര്‍ത്തിയിരുന്നതെന്താവാം...? ആലോചിക്കാന്‍ ശ്രമിച്ചിട്ടില്ല അതെന്താണെന്ന്... തങ്ങളില്‍ ഒരാളായി കണ്ടിരുന്ന സുഹൃത്തുകള്‍ തന്നെയാവാം കാരണം.. ഒരിക്കലും മറ്റൊരു നാട്ടില്‍ നിന്നും വന്നതാണെന്ന് തോന്നാന്‍ അവര്‍ അനുവദിച്ചിട്ടില്ല... ഇവിടുത്തെ എല്ലാ ആഘോഷങ്ങളിലും അവരിലൊരാളായി ഇഴുകിചേരാന്‍ കഴിഞ്ഞിരുന്നു...
സുഹൃത്തുക്കള്‍ മാത്രമല്ല ഈ ജനതയും അങ്ങിനെ തന്നെയാണ്.. തങ്ങളുടെ നാട്ടിലേക്ക് വന്നെത്തുന്ന അന്യ നാട്ടുകാരെ ഇത്രത്തോളം നിറഞ്ഞ മനസ്സോടെ സ്വീകരിക്കുന്ന വേറെ ഒരു ജനത കാണുമോ..? ഇവിടേയ്ക്ക് എല്ലാവര്ക്കും സ്വാഗതമാണ്... പിന്നെ തങ്ങളുടെ ഭാഷയോടുള്ള അടങ്ങാത്ത സ്നേഹം അതും ഇവരുടെ പ്രത്യേകതയാണ്... അന്യനാട്ടില്‍ നിന്ന് വരുന്നവര്‍ തങ്ങളുടെ ഭാഷ സംസാരിക്കാന്‍ പഠിക്കണം എന്നൊരു നിര്ബന്ധം അവര്ക്കുണ്ട്.. അവരുടെ ഭാഷ സംസാരിക്കാന്‍ അറിയാം എന്നറിഞ്ഞാല്‍ അവര്‍ ഒരുപാടു സ്നേഹവും ബഹുമാനവും നല്കും...
നാളെ യുഗാദി... ആഘോഷങ്ങളേക്കാള്‍ കര്‍ണ്ണാടകയുടെ ആത്മാവിനെ തൊട്ടറിയാന്‍ കിട്ടുന്ന അവസരം.. യുഗാദി എന്ന പദം സൂചിപ്പിക്കുന്നത് പോലെ തന്നെ ഒരു സംവത്സരത്തിന്റെ ആരംഭം ആണിത്... വിജയ നാമ സംവത്സരമാണ്‌, നാളെ മുതല്‍ ആരംഭിക്കുന്നത്... കഴിഞ്ഞു പോയ നാളുകളെ തള്ളിമാറ്റി, നവ പ്രതീക്ഷകളോടെ, വിജയകരമായൊരു പുതിയ യുഗത്തെ വരവേല്‍ക്കലാണ്... യുഗാദിക്കു ദിവസങ്ങള് മുന്‍പ് തന്നെ വീടും അതിലെ എല്ലാ വസ്തുക്കളും വൃത്തിയാക്കും..
മാവിലയും ആര്യവേപ്പിന്റെ ഇലകളും വാതില്‍പടിയില്‍ തൂക്കി, രംഗോലി (അരിമാവ് കൊണ്ടുള്ള കോലം) വരച്ചു, പുതുവസ്ത്രങ്ങള്‍ അണിഞ്ഞു പുതുവത്സരത്തെ വരവേൽക്കുന്നു.. ഭക്ത ജനങ്ങള്‍ അതിരാവിലെ എണ്ണ തേച്ചു കുളി കഴിഞ്ഞു, ദൈവനുഗ്രഹത്തിനായി പൂജയും മറ്റു പ്രാര്ത്ഥനകളും നടത്തുന്നു... പുതിയ വ്യവസായങ്ങള്‍ക്കും , മറ്റു തുടക്കങ്ങള്‍ക്കും നല്ല സമയമായാണ് കണക്കാക്കുന്നത്...
ഉഗാദി പച്ചടി എന്ന് വിളിക്കുന്ന 6 തരം രുചികള്‍ ഉള്പ്പെടുത്തിയ പ്രത്യക വിഭവം യുഗാദിക്കു ഒരുക്കാറുണ്ട്....... എരിവും, പുളിയും, കയ്പും, മധുരവും, ഉപ്പും എല്ലാം ഉള്പ്പെടുത്തിയ ഒരു പ്രത്യക വിഭവം ആണ് ഇത് .. പുതു വര്ഷം തുടങ്ങുമ്പോള്‍ തന്നെ, എരിവും, പുളിയും, മധുരവും, കയ്പും എല്ലാം ചേര്‍ത്ത് കഴിക്കുന്നതിലൂടെ ജീവിതത്തില്‍ നേരിടേണ്ടി വരുന്ന ഏതൊരു അവസ്ഥ യെയും നേരിടാന്‍ മനസ്സിനെ പാകപ്പെടുത്തുകയാണ്...
• ആര്യ വേപ്പിന്റെ പൂക്കള്‍ ഭക്ഷിക്കുന്നത് - ജീവിതത്തിലെ കയ്പേറിയ/ സങ്കടപ്പെടുത്തുന്ന അനുഭവങ്ങളെ സൂചിപ്പിക്കുന്നു.
• ശര്‍ക്കര അല്ലെങ്കില്‍ പഴം കഴിക്കുന്നത്‌ - ജീവിതത്തിലെ സന്തോഷകരമായ അനുഭവങ്ങളെ സൂചിപ്പിക്കുന്നു.
• മുളക് ഭക്ഷിക്കുന്നത് - ദേഷ്യത്തെ സൂചിപ്പിക്കുന്നു.
• ഉപ്പു ഭക്ഷിക്കുന്നത് - ഭയത്തെ സൂചിപ്പിക്കുന്നു.
• പുളിവെള്ളം - വിദ്വേഷം/ വെറുപ്പിനെ സൂചിപ്പിക്കുന്നു.
• പഴുക്കാത്ത മാങ്ങാ - അതിശയത്തെ സൂചിപ്പിക്കുന്നു.
യുഗാദിക്കു ഒരുക്കുന്ന ഏറ്റവും പ്രധാനപ്പെട്ടതും പ്രിയപ്പെട്ടതുമായ വിഭവമാണ് ഒബെട്ട്... ഒരിക്കലും മറക്കാനാവാത്ത മധുരം... ഈ നാടിനെ ഓര്‍ക്കുമ്പോള്‍ തന്നെ മനസ്സിലെക്കോടിയെത്തുന്നത് ഈ മധുരത്തിന്റെ ഓര്‍മ്മയാണ് ... ഈ മധുരം എന്റെ പ്രിയപ്പെട്ട സുഹൃത്തുക്കളുടെ സ്നേഹത്തിന്റെ ഓര്‍മ്മ കൂടിയാണ് എനിക്കെന്നും..
ജീവിത യാത്രയില്‍ നഷ്ടപ്പെടാന്‍ പോവുന്ന, മാധുര്യമേറിയ, ഒരു കാലഘട്ടത്തിന്റെ ഓര്‍മ്മക്കുറിപ്പുകളില്‍..... നീണ്ട ഏഴു വര്ഷം കൂടെയുണ്ടായിരുന്ന പ്രിയ സുഹൃത്തുക്കളെ, ഒരുപാട് സ്നേഹത്തോടെ , എല്ലാവര്ക്കും യുഗാദി ആശംസകള്‍......
No comments:
Post a Comment