സുഷുപ്തി.....!!!

എന്റെയുള്ളിലെ നീറുന്ന മൌനത്തിനും
നിനക്കും ഒരേ മുഖം
ആയിരം വട്ടം ഉരുക്കഴിച്ച
സ്നേഹ മന്ത്രത്തിലും
അക്ഷരത്തെറ്റുകള്‍
ഇരുണ്ട നിറമുള്ള കാളിന്ദികള്‍ പോലെ..

ഏതോ വരണ്ട സായാഹ്നത്തില്‍
ഉടലാര്‍ന്ന നിന്റെ പ്രണയം,
നിന്നില്‍ നിന്നൊഴുകുന്ന
തീക്ഷ്ണ മൌനത്തിന്റെ
അരുവികളില്‍
മടുപ്പിന്റെ വിഷ ലിപ്തമായ
നീലിച്ച ഞരമ്പുകള്‍ പിടയുന്നു

സ്നേഹത്തിന്റെ പട്ടു തൂവാലയില്‍
നെയ്തെടുത്ത നീയെന്ന സൂര്യ ബിംബം
വ്യാമോഹത്തിന്റെ
കടുത്ത നഖക്ഷതങ്ങളേറ്റ്,
മുറിവുകളില്‍ നിന്ന് രക്തം പൊടിഞ്ഞു,
തീത്തുള്ളികളായി ഇറ്റു വീഴുന്നു.....

കടലാഴങ്ങളില്‍ ഒളിപ്പിച്ച
മുത്തുച്ചിപ്പികള്‍ പോലെ,
നിന്റെ മൌനത്തിന്റെ
ആഴങ്ങളില്‍ നിന്നും,
എന്നിലേക്ക്‌ പെയ്തിറങ്ങുന്ന
സാന്ദ്രമായൊരു സംഗീത ശകലം...
മുറുകിയ വീണാതന്ത്രികളില്‍
ഏതോ നേര്‍ത്ത വിരല്‍ സ്പര്‍ശം
ഉണര്‍ത്തിയ
സപ്തസ്വരങ്ങള്‍ പോലെ....

നിന്റെ മൌനം..
ചിലപ്പോള്‍ നിരര്‍ത്ഥകമായ
ഒരു കാത്തിരിപ്പു പോലെ...
ചിലപ്പോഴൊക്കെ നിന്റെ
കണ്ണുകളെക്കാള്‍ വാചാലവും...
ഈ നിഗൂഡതയ്ക്ക് ഇനിയുമിനിയും
അനേകം അര്‍ത്ഥ തലങ്ങളുണ്ടാവാം...
എങ്കിലും എന്നിലുറയുന്ന,
നിന്റെ മൌനത്തിന്റെ
ആത്മാംശത്തെ അറിയുന്നു ഞാന്‍....

യാത്രാമൊഴിയോതുന്ന സൂര്യന്റെ
കണ്ണുകളില്‍ മരണത്തിന്റെ തിളക്കം..
പിന്നെയും
തുടരുന്ന യാത്ര
കാലാന്തരത്തിനുമപ്പുറം
ജന്മാന്തരങ്ങളിലൂടെ അലഞ്ഞലഞ്ഞു
വീണ്ടുമൊരു ജന്മത്തിനായ്

ഇനി
നോവുകളെ ചേര്‍ത്തടുക്കി
ഒരു കുടന്ന നിലാവിനെ
അഗ്നിയില്‍ ഉരുക്കിയൊഴിച്ചു
ഒരുക്കിയ ചിതയില്‍,
കടും നിറമുള്ള ജ്വാലയില്‍
പൊട്ടിത്തെറിച്ചു, കത്തിയെരിഞ്ഞടങ്ങണം......

എനിക്കൊന്നുറങ്ങണം......
ദാഹിച്ചു വരണ്ട നാവിലൊരു മഴ
കുടിനീര്‍ വീഴ്ത്തവേ,
തണുത്തുറഞ്ഞ ഭൂമിയുടെ മാറില്‍
മുഖം ചേര്‍ത്ത്, ശാന്തമായ്....
മൌനത്തിന്റെ മിന്നലൊളിയിലൂടെ
ഓര്‍മ്മകളിലെക്കൂളിയിട്ടു
മരണത്തോളമെത്തുന്ന സുഷുപ്തി.....!!!!!

********************